റയൽ മാഡ്രിഡ് ഡ്രസ്സിംഗ് റൂമിൽ ഭിന്നത; അൽവാരോ അർബലോയുമായി അകന്നതെന്ന് റിപ്പോർട്ട്

റയൽ മാഡ്രിഡ് ടീമിനുള്ളിൽ അസ്വാരസ്യങ്ങൾ പുകയുന്നതായി റിപ്പോർട്ട്. പരിശീലകൻ അൽവാരോ അർബലോയുമായി ടീമിലെ ആറോളം താരങ്ങൾ സംസാരിക്കാൻ വിസമ്മതിക്കുന്നതായാണ് മാർക്ക പുറത്തുവിട്ട വാർത്ത. സീസൺ നിർണ്ണായക ഘട്ടത്തിലേക്ക് കടക്കുമ്പോൾ ഡ്രസ്സിംഗ് റൂമിലെ ഇത്തരം ഭിന്നതകൾ ടീമിന് വലിയ തിരിച്ചടിയാകുന്നുണ്ട്.

അർബലോയുടെ പരിശീലന രീതികളോടുള്ള അതൃപ്തിയാണ് പല താരങ്ങളെയും അദ്ദേഹത്തിൽ നിന്ന് അകറ്റിയത്. ടീമിലെ യുവതാരങ്ങൾക്കിടയിലും ഹോം ഗ്രൗൺ താരങ്ങൾക്കിടയിലുമാണ് ഈ അഭിപ്രായവ്യത്യാസം കൂടുതൽ പ്രകടമായിരിക്കുന്നത്.

ഡാനി സെബല്ലോസ്, ഡാനി കർവജാൽ, റൗൾ അസെൻഷ്യോ, അൽവാരോ കരേരസ് എന്നിവരുമായി ബന്ധപ്പെട്ട ചില തർക്കങ്ങൾ കഴിഞ്ഞ ആഴ്ചകളിൽ പുറത്തുവന്നിരുന്നു. പ്രശ്നം പരിശീലകൻ-താരം എന്നതിലുപരി, താരങ്ങൾ തമ്മിലുള്ള ഐക്യത്തെയും ബാധിച്ചതായി റിപ്പോർട്ടുകൾ വ്യക്തമാക്കുന്നു. ഡ്രസ്സിംഗ് റൂമിൽ താരങ്ങൾ പരസ്പരം സംസാരിക്കുന്നത് പോലും കുറവാണെന്നാണ് പുറത്തുവരുന്ന വിവരങ്ങൾ.

എൽ ക്ലാസിക്കോ മത്സരത്തിന് തൊട്ടുമുമ്പുള്ള ഈ സാഹചര്യം റയൽ മാഡ്രിഡിനെ സംബന്ധിച്ചിടത്തോളം വലിയ പ്രതിസന്ധിയാണ് സൃഷ്ടിക്കുന്നത്. അർബലോയുടെ ശൈലിയെ ചൊല്ലി ടീം ഇതിനകം തന്നെ പല തട്ടിലായതോടെ, വരാനിരിക്കുന്ന പ്രധാന മത്സരങ്ങളെ എങ്ങനെ നേരിടും എന്ന ആശങ്കയിലാണ് ആരാധകർ.