വില്യം സാലിബയെ പ്രശംസിച്ച് മാഴ്സൽ ദേശായി; തന്റെ മുൻ നിലപാടിൽ ഖേദം പ്രകടിപ്പിച്ച് ഫ്രഞ്ച് ഇതിഹാസം

ആഴ്സണലിന്റെ സെന്റർ ബാക്ക് വില്യം സാലിബയുടെ പ്രകടനത്തെ പ്രശംസിച്ച് മുൻ ഫ്രഞ്ച് പ്രതിരോധതാരം മാഴ്സൽ ദേശായി രംഗത്തെത്തി. നേരത്തെ സാലിബയുടെ കഴിവിനെക്കുറിച്ച് തനിക്ക് സംശയമുണ്ടായിരുന്നെന്നും, എന്നാൽ താരം അത് തെറ്റാണെന്ന് തെളിയിച്ചെന്നും ദേശായി പറഞ്ഞു.

സാലിബയുടെ മികവിനെക്കുറിച്ച് താൻ നേരത്തെ നടത്തിയ പരാമർശങ്ങളിൽ ഇപ്പോൾ ഖേദം പ്രകടിപ്പിക്കുന്നതായി ലോകകപ്പ്, ചാമ്പ്യൻസ് ലീഗ് ജേതാവായ ദേശായി വ്യക്തമാക്കി. ഇതുമായി ബന്ധപ്പെട്ട് അടുത്തിടെ നൽകിയ അഭിമുഖങ്ങളിൽ താരം ഔദ്യോഗികമായി മാപ്പ് ചോദിക്കുകയും ചെയ്തിട്ടുണ്ട്.

“സാലിബയുടെ തുടക്കകാലത്ത് ഞാൻ അദ്ദേഹത്തെ അനുകൂലിച്ചിരുന്നില്ല. എന്നാൽ ഇപ്പോൾ അദ്ദേഹം കളിക്കുന്ന രീതി കണ്ട് എനിക്ക് വലിയ സന്തോഷമുണ്ട്. സ്ഥിരതയാർന്ന പ്രകടനം കാഴ്ചവെക്കുന്നതിൽ സാലിബ വിജയിച്ചു. സെർജിയോ റാമോസിനെപ്പോലെ പന്തുമായി മുന്നോട്ട് കുതിക്കാൻ സാലിബയ്ക്ക് കഴിഞ്ഞെന്നു വരില്ല, പക്ഷേ വളരെ മികച്ചതും സ്ഥിരതയുള്ളതുമായ ഒരു പ്രതിരോധനിരക്കാരനായി അദ്ദേഹം വളർന്നുകഴിഞ്ഞു,” ദേശായി പറഞ്ഞു.

നിലവിൽ ലോകത്തിലെ ഏറ്റവും മികച്ച പ്രതിരോധതാരങ്ങളിൽ ഒരാളാണ് സാലിബയെന്ന് ദേശായി അഭിപ്രായപ്പെട്ടു. തന്റെ മികച്ച ഫോം നഷ്ടപ്പെട്ട വിർജിൽ വാൻ ഡിക്കിനേക്കാൾ മികച്ച പ്രകടനമാണ് സാലിബ ഇപ്പോൾ കാഴ്ചവെക്കുന്നതെന്നും അദ്ദേഹം കൂട്ടിച്ചേർത്തു. പരിക്കുകളില്ലാതെ തുടർന്നാൽ വരും വർഷങ്ങളിലും താരം ഇതേ മികവ് നിലനിർത്തുമെന്ന് ദേശായി വിശ്വാസം പ്രകടിപ്പിച്ചു.

“എന്റെ മുൻ നിലപാടുകൾക്ക് ഞാൻ മാപ്പ് ചോദിക്കുന്നു. ഒപ്പം സാലിബയെ അഭിനന്ദിക്കുകയും ചെയ്യുന്നു. തന്നെ വിമർശിച്ചവരുടെ വായടപ്പിക്കാൻ സാലിബയ്ക്ക് കഴിഞ്ഞു. ആഴ്സണലിന് ആവശ്യമായിരുന്ന ഒരു നേതൃഗുണം ടീമിൽ കൊണ്ടുവരാൻ അദ്ദേഹത്തിന് സാധിച്ചു. ഗബ്രിയേലുമായുള്ള സാലിബയുടെ കൂട്ടുകെട്ട് വളരെ മികച്ചതാണ്,” ദേശായി വ്യക്തമാക്കി.