ഇന്ത്യൻ ഫുട്ബോൾ ലീഗ്: ഗോകുലം കേരളയെ തകർത്ത് ഡയമണ്ട് ഹാർബർ എഫ്സി; ഷില്ലോങ് ലാജോങ്ങിന് തകർപ്പൻ ജയം

ഇന്ത്യൻ ഫുട്ബോൾ ലീഗ് 2025-26 സീസണിൽ കല്യാണി സ്റ്റേഡിയത്തിൽ നടന്ന മത്സരത്തിൽ ഗോകുലം കേരള എഫ്സിക്കെതിരെ 5-2 എന്ന സ്കോറിന് വിജയിച്ച് ഡയമണ്ട് ഹാർബർ എഫ്സി പോയിന്റ് പട്ടികയിലെ ഒന്നാം സ്ഥാനം ഭദ്രമാക്കി. ശനിയാഴ്ച നടന്ന മത്സരത്തിലെ ഈ തോൽവി ഗോകുലം കേരളയുടെ റെലിഗേഷൻ ഘട്ടത്തിലേക്കുള്ള പ്രവേശനം ഉറപ്പിച്ചു.

മത്സരത്തിന്റെ 17-ാം മിനിറ്റിൽ ബൗബ അമിനുവിലൂടെ മലബാറിയൻസ് ലീഡ് നേടിയെങ്കിലും, ആദ്യ പകുതിയിൽ തന്നെ ലൂക്ക മജ്സെൻ ഡയമണ്ട് ഹാർബറിനായി സമനില ഗോൾ കണ്ടെത്തി. രണ്ടാം പകുതിയുടെ തുടക്കത്തിൽ തന്നെ ഹ്യൂഗോ ഡിയാസ് ഇരട്ട ഗോളുകൾ നേടി ടീമിന് മുൻതൂക്കം നൽകി. പിന്നാലെ ജോബി ജസ്റ്റിനും ആർ. രാംദിൻതാരയും കൂടി സ്കോർ ചെയ്തതോടെ ഡയമണ്ട് ഹാർബർ ആധികാരിക വിജയം സ്വന്തമാക്കി. രാഹുൽ രാജുവാണ് ഗോകുലത്തിനായി രണ്ടാമത്തെ ഗോൾ നേടിയത്. മത്സരത്തിൽ മികച്ച പ്രകടനം കാഴ്ചവെച്ച ഹ്യൂഗോ ഡിയാസിനെ ‘പ്ലെയർ ഓഫ് ദി മാച്ച്’ ആയി തിരഞ്ഞെടുത്തു.

ഒൻപത് മത്സരങ്ങളിൽ നിന്ന് 22 പോയിന്റുമായി ഡയമണ്ട് ഹാർബർ എഫ്സി ലീഗിലെ ആദ്യ റൗണ്ട് ഒന്നാം സ്ഥാനത്തോടെ പൂർത്തിയാക്കി. അതേസമയം, ഒൻപത് മത്സരങ്ങളിൽ നിന്ന് എട്ട് പോയിന്റ് മാത്രമുള്ള ഗോകുലം കേരള പോയിന്റ് പട്ടികയിൽ അവസാന നാല് സ്ഥാനങ്ങളിൽ തുടരുന്നു.

മറ്റൊരു മത്സരത്തിൽ ഐസോൾ എഫ്സിക്കെതിരെ 6-1 എന്ന വലിയ വിജയമാണ് ഷില്ലോങ് ലാജോങ് സ്വന്തമാക്കിയത്. ഷില്ലോങ്ങിനായി ട്രെമിക്കി ലമുറോങ് ഇരട്ട ഗോളുകൾ നേടി. ഫ്രാംകി ബുവാം, എവർബ്രൈറ്റ്സൺ സന, ഗ്ലാഡി ഖാർബുലി, ലാംലിയൻ വൈഫി എന്നിവരാണ് ടീമിനായി മറ്റ് ഗോളുകൾ നേടിയത്. ഐസോളിനായി ലാൽഹ്രിയാത്പുയ ആശ്വാസ ഗോൾ നേടി. ഒൻപത് മത്സരങ്ങളിൽ നിന്ന് 17 പോയിന്റുമായി ഷില്ലോങ് ലാജോങ് താൽക്കാലികമായി പട്ടികയിൽ രണ്ടാമതെത്തി. തോൽവിയോടെ ഐസോൾ ഏഴാം സ്ഥാനത്തേക്ക് പിന്തള്ളപ്പെടുകയും റെലിഗേഷൻ ഘട്ടത്തിലേക്കുള്ള പ്രവേശനം ഉറപ്പാക്കുകയും ചെയ്തു.

പ്രസിദ്ധീകരിച്ചത്: ഏപ്രിൽ 18, 2026