മാഞ്ചസ്റ്റർ സിറ്റിയുടെ മികച്ച പ്രവർത്തനവും ടീമിന് ലഭിക്കുന്ന പിന്തുണയുമാണ് ക്ലബ്ബിന്റെ വിജയങ്ങൾക്ക് പിന്നിലെന്ന് പരിശീലകൻ പെപ് ഗ്വാർഡിയോള. മാഞ്ചസ്റ്റർ സിറ്റിയിൽ പത്ത് വർഷം പൂർത്തിയാക്കുന്ന സാഹചര്യത്തിലാണ് അദ്ദേഹം ഇക്കാര്യം വ്യക്തമാക്കിയത്. ബാഴ്‌സലോണയിലും ബയേൺ മ്യൂണിക്കിലും ചെലവഴിച്ചതിനേക്കാൾ കൂടുതൽ കാലം സിറ്റിയിൽ താൻ തുടരുന്നതിനുള്ള കാരണം അദ്ദേഹം പങ്കുവെച്ചു.

“എനിക്ക് ലഭിക്കുന്ന മികച്ച അന്തരീക്ഷം ഇല്ലായിരുന്നെങ്കിൽ ഞാൻ ഇവിടെ പത്ത് വർഷം തുടരുമായിരുന്നില്ല,” ഗ്വാർഡിയോള പറഞ്ഞു. മുൻ താരങ്ങളായ എയ്മെറിക് ലാപോർട്ടെയെയും ഇൽക്കായ് ഗുണ്ടോഗനെയും അദ്ദേഹം ഉദ്ധരിച്ചു. “മാഞ്ചസ്റ്റർ സിറ്റി ലോകത്തിലെ ഏറ്റവും മികച്ച ക്ലബ്ബാണ്. ക്ലബ്ബ് വിട്ടുപോകുമ്പോഴാണ് അവർ എത്രത്തോളം സംഘടിതമാണെന്ന് നിങ്ങൾ മനസ്സിലാക്കുന്നത്. ഞങ്ങൾക്ക് ലഭിക്കാവുന്ന ഏറ്റവും വലിയ അംഗീകാരമാണിത്” എന്ന് ലാപോർട്ടെ പറഞ്ഞതായി അദ്ദേഹം ഓർമ്മിപ്പിച്ചു.

പ്ലെയർ കെയർ വിഭാഗം, മികച്ച ഭക്ഷണം, കുടുംബപരമായ അന്തരീക്ഷം, പിന്തുണ നൽകുന്ന ചെയർമാൻ എന്നിവയാണ് കളിക്കാർക്ക് കളിയിൽ മാത്രം ശ്രദ്ധ കേന്ദ്രീകരിക്കാൻ സഹായിക്കുന്ന പ്രധാന ഘടകങ്ങളെന്ന് ഗ്വാർഡിയോള ചൂണ്ടിക്കാട്ടി. തിങ്കളാഴ്ച എവർട്ടനെതിരായ മത്സരത്തിന് സിറ്റി തയ്യാറെടുക്കുകയാണ്. ലോണിൽ പോയ ജാക്ക് ഗ്രീലിഷ് പരിക്കിനെത്തുടർന്ന് പുറത്താണെങ്കിലും ഈ സീസണിൽ മികച്ച പ്രകടനമാണ് കാഴ്ചവെച്ചത്.

“അവന് ഏറ്റവും നല്ലത് സംഭവിക്കണമെന്ന് ഞാൻ ആഗ്രഹിക്കുന്നു,” ഗ്വാർഡിയോള പറഞ്ഞു. “ട്രെബിൾ (2022/23) സീസണിൽ അവൻ മികച്ച സ്വാധീനം ചെലുത്തിയിരുന്നു. പിന്നീട് വന്ന പരുക്ക് അവന് തിരിച്ചടിയായി. അടുത്ത സീസണിൽ അവൻ തിരിച്ചുവരുമെന്ന് തന്നെയാണ് പ്രതീക്ഷ. അവൻ പഴയ ഫോമിലേക്ക് മടങ്ങിവരുന്നത് അവനെ ആശ്രയിച്ചിരിക്കും, എന്നാൽ അവന്റെ കഴിവിൽ സംശയമില്ല.”