ന്യൂകാസിൽ യുണൈറ്റഡ് പരിശീലകൻ എഡ്ഡി ഹോവ് തുടരും; ക്ലബ്ബും മാനേജ്‌മെന്റും ഒരേ ലക്ഷ്യത്തോടെ

ന്യൂകാസിൽ യുണൈറ്റഡിന്റെ പരിശീലകനായി എഡ്ഡി ഹോവ് തന്നെ തുടരുമെന്ന് റിപ്പോർട്ടുകൾ. നിലവിലെ സീസണിന് ശേഷവും എഡ്ഡി ഹോവിനെ ടീമിൽ നിലനിർത്താനാണ് ക്ലബ്ബ് മാനേജ്‌മെന്റിന്റെ തീരുമാനം. 2026-27 സീസണിലേക്കുള്ള മുന്നൊരുക്കങ്ങളിലും ഹോവ് തന്നെയായിരിക്കും ടീമിനെ നയിക്കുകയെന്ന് ‘ദി അത്‌ലറ്റിക്’ റിപ്പോർട്ട് ചെയ്യുന്നു.

48-കാരനായ ഹോവിന് ക്ലബ്ബിന്റെ ഉന്നത നേതൃത്വത്തിൽ പൂർണ്ണ പിന്തുണയുണ്ട്. പ്രതിസന്ധികൾ നിറഞ്ഞ ഒരു സീസണിലൂടെ കടന്നുപോകുമ്പോഴും, സെന്റ് ജെയിംസ് പാർക്കിൽ തന്നെ തുടരാൻ ഹോവിനും താല്പര്യമുണ്ടെന്നാണ് സൂചനകൾ.

നോർത്തംബർലാൻഡിലെ മാറ്റ്ഫെൻ ഹാളിൽ വെച്ച് നടന്ന വാർഷിക യോഗങ്ങളിൽ ന്യൂകാസിലിന്റെ ഭൂരിഭാഗം ഓഹരിയുടമകളായ സൗദി അറേബ്യയുടെ പബ്ലിക് ഇൻവെസ്റ്റ്‌മെന്റ് ഫണ്ട് (പിഐഎഫ്) പ്രതിനിധികളുമായി മാനേജ്‌മെന്റ് ചർച്ചകൾ നടത്തിയിരുന്നു. ഈ സീസൺ ടീമിനെ സംബന്ധിച്ചിടത്തോളം പ്രതീക്ഷയ്ക്കൊത്ത് ഉയരാൻ കഴിഞ്ഞില്ലെന്ന് ഇരുവിഭാഗവും സമ്മതിച്ചു. എങ്കിലും, ടീമിന്റെ ഭാവി പ്രവർത്തനങ്ങളെക്കുറിച്ചുള്ള പൊതുവായ ധാരണയിൽ ചർച്ചകൾ പോസിറ്റീവായി അവസാനിച്ചതായാണ് റിപ്പോർട്ട്.

എഡ്ഡി ഹോവിന്റെ കീഴിൽ മുൻ സീസണുകളിൽ മികച്ച മുന്നേറ്റമാണ് ന്യൂകാസിൽ യുണൈറ്റഡ് നടത്തിയത്. ചാമ്പ്യൻസ് ലീഗ് യോഗ്യത നേടിയതും, പതിറ്റാണ്ടുകൾക്ക് ശേഷം കാരബാവോ കപ്പ് കിരീടം സ്വന്തമാക്കിയതും ഹോവിന്റെ നേട്ടങ്ങളായിരുന്നു. എന്നാൽ, ഈ സീസണിൽ ടീമിന്റെ പ്രകടനം മങ്ങിയിട്ടുണ്ട്. നിലവിൽ പ്രീമിയർ ലീഗിൽ 13-ാം സ്ഥാനത്താണ് ന്യൂകാസിൽ. കൂടാതെ, യുവേഫ ചാമ്പ്യൻസ് ലീഗിൽ നിന്ന് അവസാന 16-ൽ വെച്ച് ടീം പുറത്താവുകയും ചെയ്തിരുന്നു.