ഇന്റർ കാശി വിടാനൊരുങ്ങി അന്റോണിയോ ലോപ്പസ് ഹബാസ്

ഇന്റർ കാശി ക്ലബ്ബിലെ രണ്ട് വർഷത്തെ സേവനത്തിന് ശേഷം പരിശീലകൻ അന്റോണിയോ ലോപ്പസ് ഹബാസ് സ്ഥാനമൊഴിയുന്നു. ഞായറാഴ്ച സോഷ്യൽ മീഡിയയിലൂടെ സ്പാനിഷ് പരിശീലകൻ തന്നെയാണ് ഇക്കാര്യം അറിയിച്ചത്. ‘അധ്യായം അവസാനിക്കുന്നു: ലക്ഷ്യം പൂർത്തിയായി’ എന്ന് കുറിച്ചുകൊണ്ട്, വാഗ്ദാനങ്ങൾ പാലിക്കപ്പെടാത്ത സാഹചര്യത്തിൽ വിശ്വാസം നഷ്ടപ്പെട്ടുവെന്നും അദ്ദേഹം വ്യക്തമാക്കി.

2024-ൽ ഇന്റർ കാശിയിൽ ചുമതലയേറ്റ ഹബാസ്, തൊട്ടടുത്ത സീസണിൽ തന്നെ ടീമിനെ ഐ-ലീഗ് കിരീടത്തിലേക്ക് നയിച്ചു. ഐ-ലീഗും ഇന്ത്യൻ സൂപ്പർ ലീഗും (ഐഎസ്എൽ) ഒരേസമയം ജയിച്ച ഏക പരിശീലകൻ കൂടിയാണ് അദ്ദേഹം. എന്നാൽ, ഈ സീസണിൽ ക്ലബ്ബിലുണ്ടായ സാമ്പത്തിക പ്രതിസന്ധികൾ മാനേജ്‌മെന്റുമായുള്ള ബന്ധത്തിൽ വിള്ളൽ വീഴ്ത്തി.

കഴിഞ്ഞ മാസം പഞ്ചാബിനെതിരായ മത്സരത്തിൽ കാശി 0-3-ന് തോറ്റതിന് പിന്നാലെ നടന്ന വാർത്താ സമ്മേളനത്തിൽ ഹബാസ് പ്രതിസന്ധികൾ വെളിപ്പെടുത്തിയിരുന്നു. ക്ലബ്ബ് വളരെ സങ്കീർണ്ണമായ സാഹചര്യത്തിലൂടെയാണ് കടന്നുപോകുന്നതെന്നും, കളിക്കാർക്കും സ്റ്റാഫുകൾക്കും ശമ്പളം ലഭിക്കാത്ത അവസ്ഥയിൽ ഐഎസ്എല്ലിൽ മത്സരിക്കുക അസാധ്യമാണെന്നും അദ്ദേഹം വ്യക്തമാക്കി. ഈ അവസ്ഥയിൽ താൻ അതീവ ദുഃഖിതനാണെന്നും അദ്ദേഹം കൂട്ടിച്ചേർത്തു.

അത്‌ലറ്റിക്കോ ഡി കൊൽക്കത്തയ്‌ക്കൊപ്പം ആദ്യ ഐഎസ്എൽ സീസൺ ജയിക്കുകയും, 2024-ൽ മോഹൻ ബഗാൻ സൂപ്പർ ജയന്റിനെ ലീഗ് വിന്നേഴ്സ് ഷീൽഡ് നേട്ടത്തിലേക്ക് നയിക്കുകയും ചെയ്ത ഹബാസ്, ഇന്ത്യൻ ഫുട്ബോളിലെ ഏറ്റവും വിജയകരമായ പരിശീലകരിൽ ഒരാളാണ്. ഇന്റർ കാശിയിലെ തന്റെ കാലയളവിനെക്കുറിച്ച് സംസാരിക്കുമ്പോൾ, ഐ-ലീഗ് വിജയം, ഐഎസ്എൽ പ്രവേശനം, ക്ലബ്ബിന്റെ പ്രൊഫഷണൽ നിലവാരം നിലനിർത്തൽ എന്നീ ലക്ഷ്യങ്ങൾ കൈവരിച്ചതിൽ തനിക്ക് അഭിമാനമുണ്ടെന്ന് അദ്ദേഹം പറഞ്ഞു. തന്റെ കരിയറിലുടനീളം പിന്തുണ നൽകിയ കളിക്കാർക്കും സ്റ്റാഫുകൾക്കും അദ്ദേഹം നന്ദി അറിയിച്ചു.

ചൊവ്വാഴ്ച തന്റെ മുൻ ക്ലബ്ബായ മോഹൻ ബഗാനെതിരെയാണ് ഇന്റർ കാശിയുടെ മത്സരം. ഈ സീസണിൽ മൂന്ന് മത്സരങ്ങൾ കൂടി ബാക്കി നിൽക്കെ, ഹബാസ് ഡഗ്-ഔട്ടിൽ ഉണ്ടാകുമോ എന്ന കാര്യത്തിൽ വ്യക്തത വന്നിട്ടില്ല.

പ്രസിദ്ധീകരിച്ചത്: 2026 മെയ് 11